Derechonan di convictonan

ID-100239938Klik hier voor Nederlands

Convictonan tambe tin derechonan. Den pasado tabata reina e pensamento cu criminalnan a pone nan mes voluntariamente pafor di sociedad y dor di esey, a concientamente tuma e riesgo di perde nan derechonan. Presonan tabata wordo trata malo a base di sentimentonan di venganza y cu e speranza cu e trato malo ey lo spanta nan suficientemente. Awendia hende ta realiza cu convictonan tambe tin derecho riba un bida digno y cu ta ademas mihor pa sociedad si nan wordo prepara pa un regreso productivo den comunidad. E proceso di preparacion aki ta ser yama ‘rehabilitacion’. Un convicto cu a wordo rehabilita exitosamente, tin un chens mucho mas chikito di bolbe pa bida di criminalidad despues cu e bay den libertad. Si esey sucede toch, ta papia di ‘recidive’. Evita recidive ta un parti importante di impone castigonan. Banda di esey, castigonan, mas cu claro, mester tambe descurasha comportacion criminal. Den ley penal ta yama esey ‘prevencion’. Finalmente castigonan ta percura pa comunidad mira cu un persona cu comete un acto contra ley no ta sali liber.

1) Ki ora un hende ta un convicto?
Den su sentencia final huez ta indica si Ministerio Publico a prueba suficientemente cu un sospechoso a haci loke e ta wordo acusa di dje. Si huez haya cu Ministerio Publico no a logra prueba esey, anto e sospechoso ta wordo declara liber y no ta wordo castiga. Tambe si un sospechoso a haci loke e ta wordo acusa di dje, pero tabatin circumstancianan cu a obligue pa haci tal, e no ta wordo condena. Por ehempel, un persona cu a destrui un windshield di auto pasobra el a wak cu e chofer tabata hayando un atake di curazon, of un hende cu wordo ataca y defende su mes violentemente. Mas informacion tocante esaki Bo ta haya riba e pagina Derecho Penal. Si huez ta di opinion cu e sospechoso a haci loke e ta wordo sospecha di dje y cu e merece castigo, anto huez por sentencia e sospechoso pa un castigo, di cual castigo di prison, trabao pa comunidad y multa ta e castigonan cu mas tanto ta wordo duna. Huez por scoge tambe pa duna un castigo condicional. Esey kier meen cu e ta condena e sospechoso, pero cu e sospechoso mester cumpli cu su castigo solamente si e keda sin tene su mes na e condicionnan dentro di un periodo determina. Una vez huez sentencia un persona, e sospechoso ta bira un convicto.

2) Ki derechonan un convicto tin?
Normalmente un convicto tin cu cumpli cu su castigo. E seriedad di e delito ta determina pa gran parti e peso di e castigo. Mas serio e delito ta, mas pisa e castigo ta y mas libertadnan y derechonan e persona lo mester entrega. E castigo mas pisa, den e sentido ey, ta castigo di prison. Un persona cu a wordo condena ta perde su libertad pa un cierto periodo y ta wordo limita den loke e mag y no mag di haci. Pero e tambe tin derechonan y akibao ta describi un cantidad di nan.

a) derecho di apelacion y casacion
Supongamos cu Bo a wordo sentencia y Bo no ta de acuerdo. Bo ta haya (por ehempel) cu e castigo ta mucho halto of cu Bo ta inocente. Den consulta cu Bo abogado, Bo por dicidi pa apela. Esey kier meen cu henter e caso lo wordo trata di nobo, e biaha aki pa un huez mas halto. Den e parti Caribense di Reino, e huez mas halto ey ta Corte Comun di Aruba, Curacao y Sint Maarten y di Bonaire, St. Eustatius y Saba. Como persona cu a wordo sentencia caba, Bo tin dos siman di tempo pa bay den apelacion despues di decision di huez. Fiscal tambe tin dos siman di tempo pa bay den apelacion contra e veredicto. Corte Comun di Husticia ta trata e caso y ta bin cu su mes sentencia. Contra e sentencia aki sospechoso y fiscal por bay den apelacion na Hoge Raad. Esey ta yama ‘casacion’. Pa esaki tambe ta mantene un termino di dos siman habri. Hoge Raad ta e instancia hudicial mas halto na Hulanda y ta keda na Den Haag. Hoge Raad lo tuma e caso den tratamento solamente si mester contesta un pregunta importante tocante e forma cu a aplica ley dor di Corte Comun. No ta considera mas e hechonan. Apelacion y casacion ta partinan importante di hurisdiccion, pero Bo mester consulta bon cu Bo abogado prome cu Bo dicidi pa aplica e recursonan aki.

b) derecho riba condicionnan digno
Ora un persona haya castigo di prison, e lo mester sinta esaki na KIA. Pasobra Aruba ta forma parti di Reino Hulandes, KIA mester cumpli cu e mes normanan cu otro prisonnan den Reino. Un fuente importante pa e normanan aki ta e Comision pa Prevencion di Tortura (CPT). E comision aki ta investiga prisonnan di miembronan di Conseho di Europa (y Reino di Hulanda ta miembro) pa wak sin nan presonan ta hiba un existencia digno. Asina un persona tin derecho riba bishita, corespondencia, cuido medico y recreacion. Mas informacion Bo por haya riba website di CPT, unda tambe Bo ta haya e rapport mas recien tocante prisonnan Hulandes.

c) gratie
Un persona condena tin derecho pa pidi gratie. Esaki ta un decision di Minister di Husticia cu un parti di un castigo no mester wordo sinta. Un peticion pa gratie lo wordo duna solamente bao circumstancianan excepcional, manera por ehempel, den caso di un malesa terminal.

d) libertad condicional
Despues cu un detenido a sinta dos tercer parti di su castigo, cu un minimo di nuebe luna, e por bin na remarke pa bay den libertad condicional. Pa wordo poni den libertad condicionalmente, e detenido tin cu cumpli cu un total di condicionnan, manera por ehempel, bon comportacion den prison. E decision pa pone un detenido condicionalmente den libertad ta wordo tuma pa Minister di Husticia. Una vez poni den libertad, e ex-detenido mester comporta su mes bon durante su tempo di prueba y tene su mes na e condicionnan impone riba dje. E tempo di prueba ta dura un aña mas largo cu e parti cu e tabata falta di e castigo. Concretamente esey ta nifica cu un persona cu wordo condena pa nuebe aña di prison, ta bin den remarke pa wordo poni condicionalmente den libertad despues di a sinta seis aña di su castigo. Si e detenido aki wordo poni den libertad, e tin un tempo di prueba di cuatro aña (e tres añanan cu ta resta, mas un aña). Si e persona sentencia no tene su mes na e condicionnan durante e tempo di prueba, anto su libertad por wordo cancela pa huez. E lo mester bolbe KIA pa sinta su castigo parcialmente of totalmente.