Derechonan di suspechosonan

cuffs

Pa un sospechoso tambe un delito tin gran consecuencia. Si polis tin suficiente indicacion cu un persona a comete un delito, ta nifica cu varios di e derechonan di e persona aki lo wordo limita. E por wordo deteni, interoga y hasta cera pa un tempo. Banda di esey un sospechoso mag di wordo sigui y scucha bao circumstancianan specifico. E medidanan aki por ta radical, sigur si considera cu ta trata aki di hende cu ta djis sospechoso. Cu otro palabra, no ta sigur cu nan ta culpable ainda y posiblemente nan ta inocente tambe. Pesey mes cu uso di e medidanan aki ta mara na reglanan y limitacionnan y sospechosonan tin derecho riba proteccion contra violacionnan inhusto di nan privacidad y libertad.

1)  Ki ora mi ta un sospechoso?
Un hende ta un sospechoso segun e Wetboek van Strafvordering, ora polis a base di hechonan of circumstancianan tin e sospechoso razonable cu e persona aki a haci su mes culpable na un delito. Mester trata di 1. un delito, 2. un sospecho razonable di culpa di e persona envolvi y 3. e sospecho mester ta basa riba hechonan of circumstancianan. Si un sospecho ta razonable of no, mester wordo considera separa di e pregunta si e persona ta berdaderamente culpable. Si for di e hechonan of circumstancianan razonablemente por saca e sospecho cu un hende ta culpable, e por wordo marca como sospechoso y trata como tal, aunke ta resulta na un otro momento cu e tabata inocente. A reves: un hende no por wordo marca y trata como sospechoso sin suficiente motibo, aunke resulta despues cu e tabata culpable.

2)  Ki consecuencianan esaki tin?
Uso di opsporingsmiddelen
E hecho cu polis ta sospecha un hende di a comete un delito ta bira duidelijk pa e persona ey hopi biaha ora e wordo yama pa wordo scucha of wordo deteni. Prome cu e momento ey polis no ta obliga pa informa e persona cu e ta sospechoso. Prome cu yega asina leu, polis mag di usa procedimentonan di investigacion (opsporingsmiddelen) contra e sospechoso. Algun di e procedimentonan aki di investigacion no mag di wordo usa sin permiso di huez-comisario of fiscal, manera por ehempel, tapmento di telefon, observacion pa largo tempo of buscamento di cierto informacionnan di e sospechoso. Si polis no tin permiso y toch usa e procedimentonan aki di investigacion, esaki por tin consecuencianan serio pa e caso penal contra e sospechoso. Den e caso mas extremo, huez por hasta dicidi pa no trata e caso mes, pa motibo cu polis a traha sin permiso. Otro opcionnan cu huez ta aplica den e tipo di casonan aki, ta baha e castigo y rechasa pruebanan cu a wordo haya dor di uso di procedimentonan di investigacion pa cual no tabatin permiso.

Detencion preventivo
Ora un sospechoso wordo deteni a base di un sospecho razonable di culpa, e mag di keda 6 ora pa interogacion na Warda di Polis. Si fiscal of un sub-fiscal di Husticia (hopi biaha un polis cu un rango halto) ta di opinion cu mester mas tempo, anto e por dicidi cu e sospechoso por wordo poni in verzekering. Esey mag solamente si ta den interes di e investigacion, por ehempel, pasobra mester scucha e sospechoso di nobo, of pa motibo cu tin testigonan cu mester wordo confronta cu e sospechoso. Tambe si tin razonnan pa asumi cu e sospechoso lo huy of cu e lo purba pa stroba e investigacion. E periodo aki mag di dura maximo 2 dia y por wordo alarga pa fiscal cu un maximo di 8 dia. Si despues di e periodo aki resulta cu e sospecho contra e persona ta suficientemente pisa pa papia di obhecionnan serio, anto huez-comisario por dicidi cu e sospechoso wordo poni den detencion preventivo (voorlopige hechtenis). E voorlopige hechtenis ta consisti di dos parti. E prome parti yama inbewaringstelling. Esey ta dura maximo 8 dia y mag di wordo alarga un biaha cu otro 8 dia. Despues huez-comisario ta dicidi si e sospechoso mag di wordo teni mas largo. Na e momento ey e inbewaringstelling ta sigui den gevangenhouding. E ultimo fase aki ta dura maximo 60 dia y por wordo alarga dos biaha cu 30 dia. Si e caso mester wordo hiba dilanti huez durante e periodo aki, anto e gevangenhouding ta dura te e sentencia.

3)  Ki derechonan e sospechoso tin?
Aki riba un cantidad di consecuencia pa e sospecho a wordo poni riba un rij y manera Bo por wak nan por ta hopi radical. No obstante e hecho cu un sospechoso ta inocente te cu lo contrario a keda prueba, ta posible cu bin infraccionnan serio riba su libertad y privacidad, hasta prome cu keda estableci cu el a comete un hecho castigable. Pesey mes ley ta ofrece proteccion pa evita cu polis y husticia bay mas leu cu lo necesario y razonable. Akibao ta sigui un enumeracion di e derechonan mas importante riba cual e sospechoso por haci un apelacion.

1) Derecho di tene silencio. Un sospechoso no tin cu coopera na su mes conviccion y na tur momento por opta pa tene silencio, tanto durante interogacionnan na polis como dilanti huez. Prome cu e wordo scucha, e mester wordo mustra riba e derecho aki.
2) Derecho riba asistencia legal. Un sospecho tin derecho di papia cu un abogado prome cu su prome interogacion. Si e no por paga un abogado, un sospechoso tin derecho riba asistencia legal liber (pa mas informacion wak e website di Orde van Advocaten). Ademas un sospechoso tin derecho riba comunicacion confidencial cu su abogado, cu otro palabra, e no mag di wordo scucha, a menos cu e abogado mes por wordo marca como sospechoso.
3) Derecho riba un traductor. Un sospecho tin derecho riba asistencia di un traductor si e no papia e idioma.Derecho riba control di e detencion preventivo. Un sospechoso  cu wordo poni den detencion mester presenta despues di tres dia y diesseis ora dilanti huez-comisario, pa controla si su detencion ta husto. Banda di esey e sospechoso tin derecho pa bringa e decision di huez-comisario (pa pone den detencion of pa pone preso) dilanti un huez mas halto.
4) Derecho di conoce e dossier. Fiscal ta colecta documentonan y pruebanan y di e manera ey ta construi un dossier. Un sospechoso tin derecho di wak su dossier, aunke e derecho aki por wordo limita den cuadro di e investigacion.
5) Derecho pa protesta contra e citacion. Ora un fiscal dicidi pa hiba un caso penal dilanti huez, e ta informa e sospechoso di esaki pa medio di un notificacion, e asina yama citacion. E citacion ta inclui e fecha riba cual huez lo scucha e caso y ta sirbi den e sentido ey como convocacion na e sospechoso. Banda di esey e citacion ta contene e acusacionnan, un descripcion di e hecho castigable di cual e persona ta wordo sospecha y e base riba cual huez por huzga. E citacion aki mester cumpli cu varios exigencia legal y si e sospechoso y su abogado ta di opinion cu e no a cumpli cu esakinan, nan por protesta dilanti huez.
6) Derecho pa scucha testigo. Hopi biaha un acusacion ta basa riba declaracionnan di testigonan. Un sospechoso tin e derecho pa laga scucha e testigonan y pa laga yama testigonan cu posiblemente por tira otro luz riba e caso.