Derechonan di victima

Logo OM Arubaklik hier voor Nederlands

Tur hende cu tabatin di haber cu criminalidad sa cu e experiencia aki por tin un impacto fuerte riba bida di un persona. Un ladronicia den cas (por ehempel) ta causa no solamente daño material, manera un bentana kibra of un television horta, pero e consecuencianan emocial ora un hende drenta Bo cas sin Bo permiso tambe por ta grandi. Manera Bo por lesa riba e website aki, Ministerio Publico ta (entre otro) encarga cu proteccion di seguridad di comunidad. Ministerio Publico ta cumpli cu e tarea ey principalmente dor di persigui delitonan den nomber di comunidad den su totalidad, pero e derechonan y interesnan di victimanan individual tambe tin atencion di Ministerio Publico. Ora perde e derechonan y interesnan aki for di vista, ta surgi e peligro cu un victima ta bolbe bira victima, numa no di e hende cu a (por ehempel) drenta horta den su cas, sino di e sistema hudicial cu no ta compronde suficientemente bon of no kier yude.

Ta di gran importancia pa informa victimanan di nan derechonan y di e posibilidadnan cu ta habri pa nan. Den casonan individual, fiscal den cooperacion cu polis y otro instancianan lo tene contacto cu e victimanan. Riba e website aki nos kier duna Bo informacion general tocante e rol y e derechonan di e victima den e proceso penal y nos ta spera di contesta algun pregunta cu ta wordo haci frecuentemente. Mas informacion Bo por haya na Bureau Slachtofferhulp.

Ken ta victima?
Wetboek di Strafvordering (Buki di Ley di Enhuiciamiento Criminal) no ta duna un definicion di e termino ‘victima’. E palabra ‘victima’ no ta ni parece den e buki di Ley aki. Na lugar di esey, Wetboek di Strafvordering ta papia di benadeelde partij (esun cu a sufri daño). E daño por consisti di daño financiero (tambe yama ‘vermogensschade’). Por pensa aki na e valor di un television cu a wordo horta of na e gastonan pa drecha un lock di porta cu a wordo kibra, pero tambe na gastonan medico cu mester a haci como consecuencia di maltrato, of na e salario of tips cu e victima a perde, pasobra e no tabata por a traha.
Banda di e daño financiero aki, un delito por causa otro tipo di daño tambe. E clase di daño aki ta wordo yama daño inmaterial y ta wordo hopi biaha describi como ‘dolor, tristeza y perdida di alegria di bida’. Resumiendo: un victima (slachtoffer of benadeelde partij) ta un persona cu como consecuencia directo di un delito cometi pa un otro hende a sufri daño financiero y/of inmaterial.

Riba kico un victima tin derecho?
1) Meld como victima
Un victima tin algun derecho di cual e por haci uso pa cuida su interesnan. E victima tin cu meld su mes como benadeelde partij. Ora Bo sufri daño pa motibo di un delito, Bo por meld Bo mes como victima (benadeelde partij) na polis. Bo por haci esaki personalmente of via carta. Bo por duna un otro persona tambe permiso, por escrito, pa haci esaki den Bo nomber (Bo mes mester firma e carta aki si). Importante: mester trata di un delito, no tur daño cu un otro hende causa ta castigable.

2) Daño y Perhuicio
Bo a sufri daño a consecuencia di un delito y Bo kier compensacion di esun cu a cause. Bo mes por cuminza un procedura via huez civil, pero si Bo no haci esey, anto Bo por opta pa exigi daño y perhuicio (te 50.000 Florin) dilanti huez penal. Si fiscal dicidi pa persigui e persona cu a causa e daño y si Bo a meld Bo mes como victima, anto Bo ta haya un yamada pa tratamento di e caso. Bo mester presenta cu prueba di e daño cu Bo a sufri, manera recibonan y cuentanan. Ademas huez por duna Bo permiso pa trece testigonan. No ta obliga, pero Bo tin derecho di busca asistencia di un abogado. Huez penal lo dicidi si e sospechoso ta culpable y mester wordo castiga y cua parti di Bo daño e lo tin cu paga.

3) Intermediacion
Como victima Bo tin derecho tambe riba intermediacion. Ora Bo mester sosten of yudanza pasobra Bo a pasa den un delito, anto polis y husticia mester intermedia pa Bo haya e sosten aki. Si Bo kier yega na un areglo pa e daño y perhuicio cu e autor di e delito a causa, polis y husticia mester intermedia tambe, pero solamente si e sospechoso a admiti y di su propio voluntad kier coopera na un areglo asina.

4) Derecho di papia?
Na Hulanda victimanan tin derecho pa hiba palabra den sala di Corte. Den Ley Arubiano e victima no tin e derecho ey (ainda). Un victima por wordo yama si pa fiscal of den Corte y den e caso ey e mester presenta. Den Corte su derecho di declara como testigo ta limita na contesta preguntanan cu wordo haci. Banda di esey e victima por duna splicacion tocante e claim cu el a entrega.