Tareanan

copy-cropped-PPG_logo_CMYK10.jpgklik hier voor Nederlands

E tarea primordial di Ministerio Publico ta para den articulo 3 di e Ley di Ordenanza riba e organisacion di e poder hudicial: “Ministerio Publico ta encarga cu e mantencion di e ordenanzanan legal,  e persecucion di hechonan castigabel, e ehecucion di sentencianan y decisionnan di huez den casonan penal y e control riba cumplimento cu decisionnan di huez den casonan disciplinario”.

E tarea principal di Ministerio Publico por wordo parti den 4 tarea:

  1. Mantencion di ordenanzanan legal;
  2. Guia investigacion di hechonan castigabel;
  3. Persecucion di hechonan castigabel;
  4. Control riba ehecucion di sentencianan den casonan penal.

Den e siguiente parti ta sigui mas informacion tocante e 4 tarea di Ministerio Publico.

Ministerio Publico ta e organisacion cu ta encarga cu mantene ordenanzanan legal. E tarea di Ministerio Publico ta pa percura pa habitantenan di Aruba no viola e regla- y leynan di Aruba. Particularmente Ministerio Publico ta encarga cu e mantencion di leynan penal. Leynan penal ta tur regla- y leynan riba cua tin un castigo pa esnan cu viola nan. E mantencion di e leynan tin como meta preveni, domina y combati criminalidad.

Na momento cu un hecho castigabel wordo cometi, polis ta cuminza un investigacion penal. E investigacion penal ta ensera cu agentenan policial ta busca pista, scucha testigo y eventual victima, detene sospechosonan y ta pone tur e datos di e investigacion den e asina yama proces-verbaal. Un proces-verbaal (tambe yama PV) ta un relato oficial por escrito di funcionario(nan) publico cu hechonan cu nan mes a observa y cu declaracion cu nan a anota for di boca di sospechoso of testigo y investigacionnan manera vingerafdruk, investigacion di DNA. E fiscal tambe tin un parti den e investigacion penal. No ta asina cu e fiscal mes ta haci investigacion. E fiscal ta supervisa e investigacion penal cu ta wordo haci door di agentenan di polis y ta percura pa e investigacion tuma lugar segun ley ta prescribi.

Na momento cu e agentenan di polis cla cu e proces-verbaal, e proces-verbaal ta wordo entrega na Ministerio Publico. E fiscal ta evalua tur e documentonan cu ta pertenece na e proces-verbaal y ta wak si e actuacion di e sospechoso ta castigabel segun ley. Ora cu fiscal tin tur e hechonan riba un rij, e ta tuma un decision den e caso. E fiscal mester dicidi si e sospechoso ta wordo persigui mas leu. Persigui un sospechoso mas leu kier men trece e caso dilanti di un huez. Ley di Aruba conoce e principio di oportunidad (opportuniteitsbeginsel), cu ta ensera cu fiscal no ta obliga pa trece casonan dilanti di huez. Fiscal por dicidi cu e ta seponeer un caso. Fiscal por seponeer un caso si por ehempel polis no a logra acumula suficiente prueba of si e hecho castigabel no ta uno hopi serio y e culpabel a paga e victima e dañonan cu e la causa.

Fiscal por seponeer un caso condicionalmente tambe. Ora di un sepot condicional fiscal ta haci e sospechoso un proposicion. Si e sospechoso cumpli cu e condicion(nan) di e proposicion, fiscal no lo sigui persigui e sospechoso. Un ehempel di un condicion ta cu e sospechoso ta cumpli cu un cantidad di ora di servicio pa comunidad.

Fiscal por dicidi tambe pa ofrece e sospechoso un transaccion. E sospechoso ta paga un suma di placa na pais Aruba anto e no mester bin dilanti di huez mas. E altura di e suma ta depende di e infraccion y ta wordo dicidi door di fiscal. Ta ofrece un transaccion ora e comportacion di e sospechoso ta wordo cualifica como un infraccion den ley penal, manera por ehempel core den un auto cu no ta gekeur. Ora e transaccion ta paga, fiscal ta seponeer e caso contra e sospechoso. Un sospechoso cu no paga e transaccion cu e la wordo ofreci, mester presenta dilanti huez.

Si e fiscal no ofrece e sospechoso un transaccion of un sepot condicional y e no seponeer e caso, e sospechoso ta ricibi un dagvaarding. Un dagvaarding ta un documento oficial den cua fiscal ta yama un sospechoso pa presenta riba un dia specifico dilanti di huez. Den e dagvaarding ta para tambe di kico fiscal ta acusa e sospechoso.

Banda di su otro tareanan, Ministerio Publico tin e tarea pa controla e ehecucion di tur sentencia penal. Esaki kier men cu Ministerio Publico ta controla si boetnan ta wordo paga, servicio pa comunidad imponi door di huez ta wordo haci y si personanan ta sinta nan castigo di prison.