Derecho penal

gavel

Klik hier voor Nederlands

Ministerio Publico ta percura pa personanan cu ta wordo sospecha di hechonan castigable parce dilanti huez, pa asina huez por determina si tin suficiente prueba cu nan a comete un hecho castigable y si nan merece castigo. E area di trabao di Ministerio Publico ta derecho penal. Unda hende ta haya derecho penal skirbi? Kico precies e ta encera? Kico mag y kico no mag? Esaki y otro preguntanan lo wordo contesta den e parti aki.

Unda mi ta haya derecho penal?

Derecho penal ta determina kico ciudadanonan mag y no mag. Cua comportacionnan ta prohibi y ki castigonan mag di wordo duna pa e comportacionnan ey, ta haya bek den un cantidad di ley- y reglanan, di cual esakinan ta esunnan di mas importante:

Codigo Penal – comportacionnan prohibi y castigonan
Ley di Trafico – violacionnan di trafico y boetnan
Ley di Arma – articulonan tocante cua armanan ta prohibi
Ley di Arma di Candela – articulonan tocante cua armanan di candela ta prohibi
Ley di Droga – articulonan tocante cua droganan ta prohibi
Ley di Polis (APV) – prohibicionnan general di orden publico.

Ki ora un persona ta castigable?

Den e leynan y reglanan poni aki riba tin hopi delito describi. Esey kier meen cu hendenan cu comete nan, ta core riesgo pa haya castigo. Por sucede cu un hende ta haci algo prohibi, pero cu tog e no ta merece castigo. Supongamos cu un hende dal un otro y cause daño. Normalmente esaki ta maltrato y prohibi pa ley. Pero si e haci esey pasobra e otro persona ta na punto pa hacie daño, anto por papia di defensa proprio (“noodweer”). Ta importante cu e persona cu a dal no tabata por a haci nada otro y cu e no a bay mas leu cu ta necesario. Tambe na personanan cu ta mentalmente insuficientemente desaroya, den algun caso no por impone castigo. Un otro ehempel ta un situacion den cual un hende descubri un candela den un edificio y ta wak cu tin un persona paden. Si e kibra un bentana pa scapa e persona, ta trata di destruccion, pero no castigable, pasobra tabatin un situacion di emergencia. Via e link aki bo ta haya e articulonan den Codico Penal cu ta determina den cua casonan comportacion prohibi no mester hiba na castigo.

Ki sorto di castigo ta existi?

Derecho penal Arubiano tin cuater castigo principal: castigo di prison, detencion, ‘taakstraf’ y boet. Banda di esey huez por kita den algun caso cierto derechonan (manera e derecho pa vota), cierto pertenencianan (si nan wordo usa pa comete un hecho castigable) y publica e sentencia hudicial. Tambe huez por determina cu un parti di e castigo no mester wordo sinta bao condicion cu e sospechoso, por ehempel, traha pa comunidad of  ta sigui un cierto curso y no ta haci su mes culpable otro biaha na un hecho castigable dentro di un período determina (“proeftijd”).