E Proceso Penal

gavel2

Klik hier voor Nederlands

Introduccion
E significacion literal di e palabra proceso penal ta: proceso hudicial den cua un huez ta determina si un hecho castigabel a wordo cometi. E proceso penal ta cuminsa cu e sospecho cu un hecho castigabel a wordo cometi. Den su prome fase e proceso penal tin un caracter investigativo. Esey kier men cu polis y husticia ta haci investigacion pa haya sa kico a conduci na e hecho castigabel. Poco poco pero sigur e caracter di e proceso penal ta cambia di investigativo pa acusatorio; durante tratamento di e caso dilanti un huez Ministerio Publico representa door di un fiscal y e sospechoso ta para dilanti di otro.

E Proceso penal
E proceso penal ta transcuri den fase, di cua e investigacion preparatorio y e investigacion di huez durante tratamento di e caso ta e dosnan mas importante. E investigacion preparatorio ta dirigi riba e busqueda y persecucion di e sospechoso y ta bou guia di Ministerio Publico. E investigacion penal cu ta wordo haci door di polis y e investigacion hudicial preliminar cu ta den man di huez-comisario ta pertenece na e investigacion preparatorio. Den e investigacion hudicial preliminar e huez-comisario tin un posicion central den scuchamento di sospechoso(nan), testigo(nan) y experto(nan), e aplicacion di medidanan particular obligatorio (dwangmiddelen) y e apelacion di e sospechoso contra decision(nan) tuma door di fiscal. Na momento cu e investigacion preparatorio a trece suficiente hechonan dilanti y e sospechoso a wordo yama pa presenta dilanti huez, e investigacion di huez ta cuminsa.

E investigacion di huez durante tratamento di e caso, e asina yama investigacion di e caso ter terechtzitting, ta e parti mas importante di e proceso penal. Bou di presidencia di e huez di Corte den Prome Instancia e fiscal cu a tuma e decision pa persigui un sospechoso y e sospechoso, cu por wordo asisti door di un abogado, ta para dilanti di otro. Tur interaccion cu tuma lugar durante tratamento di e caso, ta tuma lugar segun un manera fijo.

Un deurwaarder ta anuncia e caso. Despues cu e caso a wordo anuncia huez ta controla e datonan personal di e sospechoso. Tambe huez ta avisa e sospechoso cu e tin cu paga bon tino y e ta mustra e sospechoso riba su derecho pa keda keto, e sospechoso su zwijgrecht, y riba su derecho pa ricibi asistencia di un abogado. Ora cu huez cla cu e parti aki, e fiscal di Ministerio Publico ta presenta e caso. Presenta un caso kier men cu e fiscal ta trece dilanti di kico e sospechoso ta wordo acusa. Si tin testigo of experto cu mester wordo scucha, esey lo pasa promer. Despues e huez ta haci pregunta na e sospechoso y ta trece e pruebanan cu tin den e dossier dilanti. E fiscal y e abogado di e sospechoso tambe ta haya oportunidad pa haci e sospechoso pregunta.

Despues cu tur e hechonan di e caso a wordo treci dilanti, e huez ta pone atencion riba e circumstancianan personal di e sospechoso. E circumstancianan personal ta importante pa e huez haya un mihor bista den e pasado di e sospechoso y e hecho castigabel di cua e persona ta wordo acusa. Asina e huez por huzga mihor cua castigo ta na su lugar.

Si ta necesario lo trece incidentenan dilanti. Esaki ta pasa despues cu a trata e circumstancianan personal  di e sospechoso. Un ehempel di un incidente ta e demanda di un partido perhudica. Un partido perhudica ta un persona cu a sufri dañonan como consecuencia di un hecho castigabel. E partido perhudica por uni su mes na e proceso penal y pidi huez pa condena e sospechoso na paga e daño haci na su persona.

Despues di e tratamento di e demanda di e partido perhudica, e fiscal ta tene su requisitorio. E requisitorio ta e argumentacion di e fiscal durante tratamento di un caso den cua e ta motiva pakico e sospechoso a comete of no a comete e hechonan cu ta acus’e di nan y con huez segun e fiscal lo mester huzga e caso. Ora e fiscal cla cu e requisitorio ta turno pa e abogado su pleidooi. E pleidooi ta e argumentacion di e abogado na defensa di e sospechoso den cua e ta splica dilanti huez con huez lo mester huzga e caso contra su cliente. En bez di e palabra pleidooi por usa tambe defensa.

E sospechoso semper tin derecho riba e ultimo palabra. Despues di e ultimo palabra di e sospechoso, e huez ta sera tratamento di e caso. Na momento cu e tratamento di e caso ta sera, e huez tin dos opcion. E huez por dicta sentencia imediatamente of e por bisa cu e ta dicta sentencia despues. Si huez dicidi cu e ta dicta sentencia despues, e ta mara na un periodo maximo di tres siman. Esaki kier men cu despues di a sera tratamento di e caso, e huez mester dicta sentencia dentro di tres siman.

E sentencia
Huez a dicta sentencia. E fiscal y e sospechoso por apela e sentencia di e huez den prome instancia. Si e fiscal of e sospechoso kier apela un sentencia di huez, nan tin cu haci esaki dentro di dos siman despues cu e sentencia a wordo duna door di un huez. Por apela e sentencia cerca griffie na Corte di Prome Instancia. Den apelacion e caso ta wordo trata di nobo door di tres huez di Corte Comun di Husticia di Antia Hulandes y Aruba.