E Organisacion

copy-cropped-PPG_logo_CMYK10.jpgKen ta traha na Ministerio Publico y kico nan ta haci? Aki ta sigui un vista riba e diferente funcionnan na Ministerio Publico.

Procurador-general
E Procurador-general ta hefe di Ministerio Publico. E ta supervisa investigacionnan y otro tareanan hudicial di Cuerpo Policial di Aruba. E ta representa Pais Aruba den casonan civil den cual Ministerio Publico ta envolvi. Ademas e Procurador-general ta conseha Minister di Husticia den asuntonan penal.

Abogado-general
Manera lo keda splica bao di e cabez Fiscal mayor y fiscalnan di husticia, fiscalnan ta representa Ministerio Publico den Corte di Prome Instancia. Si e persona cu wordo sentencia of Ministerio Publico no ta de acuerdo cu e decision di Corte den Prome Instancia, e persona aki of Ministerio Publico por bay den apelacion. E ora Corte Superior lo trata henter e caso di nobo. Den apelacion, Ministerio Publico ta wordo representa pa e Abogado-general (y no pa un fiscal). Den nomber di Ministerio Publico, e Abogado-general ta trata tur caso den apelacion. Tambe na otro ocasionnan, e Abogado-general ta representa Ministerio Publico, manera ora di huramentacionnan of den comisionnan.

Beleidsafdeling (Afdeling di Maneho)
E afdeling aki ta consisti di tres hurista y ta sostene e Abogado-general y e Procurador-general den nan trabao. E Afdeling di Maneho ta prepara casonan den apelacion y ta skirbi consehonan tocante asuntonan penal, manera strafoverdrachten, peticionnan pa gratie, extradicionnan, legislacion, asistencia hudicial internacional y cooperacion huridico cu e otro partinan di Reino.

Fiscal mayor y fiscalnan
Fiscalnan ta hiba e proceso di investigacion y persecucion. Nan ta haci esaki bao guia di Fiscal mayor. Bao investigacion mester compronde: trece berdad na cla den casonan penal; bao persecucion mester compronde: hiba casonan penal dilanti huez. Fiscalnan ta traha intensivamente hunto cu polis, nan ta duna indicacionnan relaciona cu investigacionnan y ta percura pa e investigacion cana na un manera cu ta huridicamente corecto. Fiscalnan ta wordo envolvi ora di detencion di sospechosonan y nan ta haci palabracionnan cu polis tocante e maneho di investigacion. Tambe nan ta percura pa e peticionnan internacional di asistencia hudicial wordo ehecuta. Banda di esey nan tin otro tareanan ancla den Ley, manera supervisa ehecucion di castigonan alternativo y vervangende hechtenis. Na Ministerio Publico tin seis fiscal ta traha bao guia di e Fiscal mayor. Cada fiscal tin su mes cartera.

Juridisch medewerkers
E afdeling aki ta responsable pa e sosten huridico di Fiscal mayor y e fiscalnan. E juridisch medewerkers ta prepara e casonan cu ta wordo trata den Prome Instancia. Nan ta traha den cooperacion estrecho cu polis y otro instancianan di investigacion y ta percura pa e investigacionnan bay segun reglanan den Ley. Tin cinco juridisch medewerker ta traha den e afdeling aki.

Executie en Justitiële Documentatie
Segun Ley Ministerio Publico ta encarga cu e ehecucion di decisionnan penal tuma pa huez. E tarea aki ta cay bao di e afdeling Executie, cu ta supervisa castigo di un persona cu a wordo sentencia y ta percura pa boetnan di placa cu wordo duna pa huez, wordo cobra. Banda di esey e afdeling ta percura pa cobra sumanan di placa cu wordo ancla den cuadro di un transaccion of sepot condicional. E balie di Ministerio Publico ta cay bao di e afdeling aki.

E afdeling Justitiële Documentatie ta hiba e strafregisters. Den e registro aki e pasado penal di personanan ta wordo nota. Ta na e afdeling aki por pidi e Carta di Buena Conducta (Verklaring Omtrent het Gedrag, VOG), despues di cual a base di e strafregisters ta wordo didici si e VOG lo wordo duna of no.

Voorlichting en Communicatie
Ministerio Publico tin autorizacionnan cu ta bay hopi leu. Esaki ta crea e responsabilidad pa informa ciudadanonan activamente tocante husticia penal, e tareanan di Ministerio Publico y e manera cu Ministerio Publico ta ehecuta e tareanan aki.

E afdeling Voorlichting en Communicatie ta aporta na esaki dor di fungi como prome punto di contacto cu prensa, tene conferencianan di prensa y traha comunicadonan di prensa. Tambe cu brochurenan, e website aki y otro materialnan di informacion ta informa ciudadanonan y e departamentonan cu cual Ministerio Publico ta traha.