E Procedura di Boet

boeteKlik hier voor Nederlands

Aki bao lo trata algun di e preguntanan cu ta wordo haci hopi relaciona cu e proceduranan y terminonan cu ta mara na paga boet.

– Mi a haya un boet, kico awor?
– Mi no ta acuerdo cu e boet, mi por protesta contra dje?
– Huez a determina mi boet, mi tin cu paga mes ora?
– Mi no a paga mi boet na tempo, kico awor?
– Mi a haya un boet, pero mi a verhuis.
– Tin boet mas stricto durante Carnaval?

  • Mi a haya un boet, kico awor?

Si Bo a haya un boet, Bo a:

1) haya un papel mes ora di polis (un asina yama ‘OPV’ of ‘Oproepings-Proces-Verbaal’), of
2) haya un informe verbal di e polis cu Bo lo haya un boet pronto.

Den e prome caso Ministerio Publico lo manda via post un asina yama ‘Kennisgeving schikkingsvoorstel’, cu ta menciona e suma di e boet. Riba e papel cu Bo a haya di e agente policial (cu a duna Bo boet) ta para e fecha y e orario di e tratamento. Bo por paga e boet aki te 2 dia prome cu e fecha.
Den e di dos caso lo Bo haya un carta cu e titulo ‘Kennisgeving schikkingsvoorstel’ den cual Bo ta wordo informa di e haltura di e boet y e ultimo fecha pa paga esaki. Bo tin te e fecha aki tempo pa paga e boet.
Si Bo ta desea pa paga e boet, Bo por acudi na e balie di Ministerio Publico na Havenstraat 2 na Oranjestad. E balie ta habri di dialuna te diabierna di 8’or pa 11.30’or di mainta y di 1’or pa 3.30’or di atardi.

  • Mi no ta de acuerdo cu e boet, mi por haci bezwaar?

Si, esey por. Aki tambe ta haci distincion entre e dos situacionnan:
1) Si Bo a haya un OPV y Bo no ta de acuerdo cu e boet, anto Bo por (riba e fecha para riba Bo OPV) bringa e boet dilanti huez. Ta importante pa sa cu den e caso ey Ministerio Publico lo para contra Bo den Corte y lo exigi un boet mas halto. Bo por wak e haltura di e exigencia den e tabel bao di e cabez “E boetnan”.
2) Si Bo a ricibi un kennisgeving schikkingsvoorstel y Bo no ta acuerdo cu e boet, Bo por haya un citacion despues cu e termino di pago pasa. Un citacion ta un carta di fiscal den cual ta describi di kico Bo ta wordo sospecha. Tambe ta menciona un fecha riba cual Bo mester presenta dilanti huez. Bo por paga Bo boet ainda te dos dia prome cu e fecha ey of scoge pa spera e exigencia di Ministerio Publico dilanti huez.

Den tur dos caso huez lo finalmente determina e suma cu Bo mester paga. Huez por scoge pa duna Bo un suma mas halto of mas abao cu e suma para riba e OPV of kennisgeving. Huez por sigui e exigencia di Ministerio Publico, pero esey no ta obliga. Banda un suma di placa huez por tambe determina dia(nan) di detencion alternativo. Esey ta e castigo di prison cu Bo tin cu sinta si Bo no paga e boet determina pa huez.

  •  Huez a determina mi boet, mi tin cu paga mes ora?

No, Bo no mester paga mes ora. Si ainda Bo no ta de acuerdo cu e boet, anto Bo por bay den apelacion. Esey ta nifica cu henter Bo caso mester wordo considera di nobo pa un huez mas halto. Bo tin dos siman tempo pa bay den apelacion. Ta importante pa Bo sa cu den apelacion Bo tin chens pa un castigo mas halto y cu e ta un procedura nobo cu ta trece gastonan nobo cu ne. Delibera cu Bo abogado tocante si apelacion ta un bon escogencia den Bo caso. Si Bo no bay den apelacion, Bo lo haya un Kennisgeving Geldboete. Riba esaki ta para e suma cu Bo mester paga y un ultimo fecha pa paga. Bo mester paga prome cu e dia aki. Si Bo no tabata presente na e decision di huez, Bo por opone e sentencia aki.

  • Mi no a paga mi boet na tempo y awor?

Aki por haci distincion entre tres situacion:

1) Bo a haya un boet por escrito di un polis (un OPV). Si Bo no paga esaki pa mas tarda dos dia prome cu e dia di e tratamiento menciona den e carta, Bo tin cu presenta dilanti huez. Huez lo wak e caso y posiblemente duna Bo un boet mas halto.

2) Si Bo a haya riba caya un comunicacion verbal di polis y siguientemente por escrito un kennisgeving schikkingsvoorstel y Bo no paga prome cu e ultimo fecha, Bo ta haya un citacion den cual Bo ta wordo yama pa presenta dilanti huez riba un cierto dia y ora. Bo tin ainda e posibilidad pa te dos dia prome cu e fecha di e tratamiento den corte paga Bo boet. Si Bo keda sin haci esey, anto huez lo wak Bo caso y posiblemente duna Bo un multa mas halto.

3) Huez a huzga Bo caso y Bo a ricibi un kennisgeving geldboete. Si Bo no paga prome cu e termino di pago, Bo ta haya un recordatorio y e boet lo wordo aumenta. Si Bo no paga e boet mas halto tampoco na ora, anto Bo boet lo wordo hisa despues di e di dos recordatorio. Si Bo no paga e aumento aki tampoco na ora, anto lo Bo wordo busca na cas pa CEA (Cuerpo Especial Aruba) y ofreci e posibilidad pa paga un biaha mas. Si Bo no paga, anto Bo mester sinta e detencion alternativo.

  • Mi a haya un boet, pero mi a verhuis

Na momento cu Bo haya un boet, Bo mester duna un adres. E adres aki lo wordo usa pa tur informe y recordatorio importante. Si Bo muda, ta di gran importancia pa informa Ministerio Publico di esaki pa asina Bo wordo teni na haltura. Tambe Bo mester informa Censo di tur Bo mudanzanan, pa asina e adresnan cu ta inscribi na Censo wordo usa pa deurwaardernan di Ministerio Publico ora di entrega e citacionnan. Ta Bo mes responsabilidad pa pasa informa di cambionan di adres.

  • Tin boetnan mas stricto durante Carnaval?

Si, desde algun aña Polis y Ministerio Publico ta actua mas stricto contra personanan cu ta usa Carnaval pa stroba orden publico y menaza seguridad riba caya. Tin boetnan mas halto y exigencianan mas halto dilanti huez.