Plan di maneho 2012-2013

Logo OM Aruba

Aki Bo ta haya e texto completo di e plan di maneho di Ministerio Publico pa aña 2012/2013. Pa informacion tocante e diferente topiconan, klik riba e subpaginanan bao di e cabez Beleid 2012-2013 den e balki di menu.

Introduccion

Ministerio Publico a scoge como punto di salida ora di traha e plan di maneho 2012/2013, pa sigui cu e maneho actual. E mision di Ministerio Publico ta pa mantene e structura democratico di nos estado di derecho cu recursonan penal. E vision di Ministerio Publico ta pa percura pa casonan wordo huzga na un manera obhetivo y profesional, cu e maneho di recursonan publico ta eficiente y transparente y cu e aplicacion di e arsenal penal ta sucede na un manera efectivo y creativo.

I.  Tareanan y vision
Ministerio Publico tin como tarea pa mantene ley, persigui delitonan, ehecuta sentencianan y decisionnan den casonan penal, como tambe supervisa cumplimiento cu decisionnan di huez den casonan disciplinario. Mantencion y proteccion di orden huridico y proteccion di seguridad den comunidad ta e tarea central di Ministerio Publico. Actuacion di Ministerio Publico ta manifesta su mes particularmente den supervisa y guia investigacionnan pa autoridadnan y persigui hechonan castigable dilanti huez.

II.  Metanan general di maneho
Ministerio Publico ta interpreta su tarea segun tres meta di maneho general, esta:

  • Equilibrio den aplicacion di ley
  • Profesionalizacion di e organizacion
  • Cooperacion optimal entre Ministerio Pubico y otro departamentonan di gobierno riba tereno di husticia penal.

III.  Puntonan di salida di maneho operacional

1. Balance den mantencion di ley

Balance den mantencion di ley kier meen na un banda cu e prioridadnan riba tereno di investigacion y persecucion ta garantiza un lucha mas efectivo posible di e problemanan di criminalidad. E kier meen na otro banda cu un ehecucion efectivo di decisionnan penal ta garantiza. Ministerio Publico ta encarga exclusivamente cu e mantencion penal di ley. Pa alcanza un bon balanza den aplicacion di ley, Ministerio Publico mester orienta su mes riba actualidad. Mester tin un orientacion equilibra di sociedad, den cual e gruponan meta aki ta di importancia:

  • victima y ciudadano
  • sospechoso y su abogado
  • polis
  • huez
  • gobierno.

 1.1. Prioridadnan di investigacion y persecucion

 1.1.1. Criminalidad violento

E enfoke riba criminalidad violento, dor di cual e salud of bida di un persona ta wordo poni den peligro of ta wordo afecta, tin semper e prioridad mas halto den maneho di Ministerio Publico. E enfoke riba violencia domestico y maltrato di mucha ta merece gran atencion. E cantidad di caso di violencia domestico y maltrato di mucha ta halto na Aruba. Cerca e victimanan aki e accento ta hopi biaha mas riba stop e violencia, cu riba persecucion di e agresor. Un prohibicion pa drenta cas, den cual e agresor ta wordo saca un par di dia for di cas, lo ta un instrumento adecuado. Ley penal por fungi tambe como un menaza eficiente. Den casonan serio y ora di viola e prohibicion di drenta cas, Ministerio Publico por detene e sospechoso y hibe dilanti huez.

Un codigo pa informa tocante violencia domestico y maltrato di mucha entre trahadornan social lo ta bon pa determina e strategia corecto. Atencion separa mester wordo duna na violencia contra autoridadnan of hendenan cu tin un tarea publico. E enfoke di criminalidad violento ta nifica tambe un maneho skerpi contra arma di candela (ilegal). E autorizacion pa ristra preventivamente lo wordo usa pa aporta na e maneho di control describi aki riba.

1.1.2.  Criminalidad hubenil
Esun cu tin hubentud, tin futuro. Ministerio Publico ta participa den e maneho hubenil integral di ministerio di Husticia y den e maneho nobo ‘Veilige School’. First offendernan hoben, cu comete delitonan leve, ta wordo yama pa un TOM-zitting y e maneho ta dirigi riba pone nan bao guia di Reclassering. Den caso di delitonan mas pisa, ta traha un plan hunto cu Reclassering. E plan aki ta dirigi riba tur factor relevante, cu por ta di importancia pa cu e actonan castigable di e sospechoso menor di edad, manera spijbelmento, stop di bay school, no traha, relacion cu mayornan, et cetera. Reclassering ta guia e sospechoso menor di edad. Si e keda sin cumpli cu su plan, lo lanta e suspension di su detencion preventivo. Na Aruba mester formula un lista di PGA (Persoonsgerichte Aanpak) di e hobennan cu frecuentemente ta bin den contacto cu polis, cu por wordo usa den un enfoke dirigi riba persona y famia.

1.1.3. Criminalidad financiero
Criminalidad financiero ta un di e formanan di criminalidad mas comun na Aruba. E daño social, cu ta wordo causa dor di e tipo aki di criminalidad ta masha grandi. Banda di esey, tin asina hopi di e crimennan aki ta tuma lugar cu nan ta aporta na e sentimentonan di inseguridad y molester cu ta reina den comunidad. Regularmente tin atraconan na Aruba, caminda ta usa violencia y tin arma di candela.  KPA tin un atraco team; Ministerio Publico tin un fiscal cu ta ocupa su mes cu atraco. Riba 16 di maart 2012 e ley BOB (Bijzondere Opsporings Bevoegdheden) a drenta na vigor, dor di cual justicia a haya mas hurisdiccion investigativo pa investiga atracadornan. E acuerdonan di ehecucion di BOB lo a bin cla na 2012. Kiebro den casnan y ladronicia di auto ta causa hopi daño social y ta afecta e sentimento di seguridad di e ciudadano. Cuerpo Policial di Aruba kier, unda ta posible, reacciona trahando den proyectonan riba e forma aki di criminalidad. Ministerio Publico lo sostene e proyectonan adecuadamente (capacidad di personal, taps, et cetera) y ademas percura pa siguimento hudicial (persecucion y ehecucion di castigonan).

1.1.4. Labamento di placa y kitamento di ganashinan criminal
Na Aruba tur ley ta cla tocante kita ganashinan obtene ilegalmente, tocante e supervision riba empresanan di transaccion di placa, e meldplicht (deber di reporta) di importacion y exportacion di placa cash, e criminalizacion di terorismo y financiamento di terorismo, e medidadnan anti-labamento di placa y e lucha contra participacion na organizacion criminal. Tanto for di e importancia di kita e tipo di ganashinan aki, como pa implementa e obligacionnan di Aruba den cuadro di FAFT (Financial Action Task Force), e posibilidadnan legal lo wordo usa. Den cooperacion estrecho cu SIAD ganashinan criminal lo wordo aborda. Pa haci e medidanan mas efectivo casnan tambe lo wordo tuma den beslag y bendi riba mercado liber. Den cooperacion estrecho cu Banco Central di Aruba lo percura pa mantencion di e integridad di e sistema financiero di Aruba. Tambe proyectonan lo wordo realiza entre otro, riba casnan di compra y venta, real estate y construccionnan. E meldingnan di MOT lo hiba posibelmente pa investigacion financiero. Na 2012 a haci un inicio di e enfoke nobo di labamento di placa; ta trata di kita partinan inexplicable di ganashinan a base di informacion haya di belasting y otro partnernan di e cadena. E enfoke riba fraude di belasting lo wordo intensiva mas ainda den cooperacion di Fiot di belastingdienst.

1.1.5.  E enfoke riba criminalidad comun
E asina yama criminalidad comun ta afecta e sentido di husticia y e sentimento di seguridad di e ciudadano. Ta trata mas tanto di delitonan financiero mas chikito, destruccionan, maltratonan, et cetera. E aspectonan social di e problematica aki ta pidi pa solucionnan via otro camindanan cu esun penal (particularmente ora ta trata di e problematica di adictonan ambulante): un enfoke integral adecua riba delincuentenan sistematico. Un enfoke penal riba un recidivista ta insuficiente. E castigonan pa e tipo di delitonan aki ta mucho cortico y inadecua pa obliga nan pa cambia nan bida. Actualmente e enfoke di e problematica di adictonan ambulante ta wordo coordina bon desde gobierno. Ministerio Publico ta sostene e maneho aki via ponemento bao curatela y ta coopera estrechamente cu e partnernan di e cadena. Den e Codico Penal nobo, cu a drenta na vigor dia prome di januari 2013, e SOV (Strafrechtelijke Opvang Verslaafden) a haya un lugar. Di cada adicto ambulante ta traha un dossier, pa asina bin un plan di enfoke individual pa cada persona. Ora un persona asina bin den contacto cu husticia, anto ta duidelijk kico mester sucede.

 1.1.6. Criminalidad organiza
E lucha contra criminalidad organiza ta exigi un enfoke organiza. A base di un CBA (Criminaliteit Beeld Analyse), e informacion corecto di CIE (Servicio di Informacion Criminal) y di Cuerpo Policial di Aruba y di RST, VDA, Belastingdienst, Aduana, Kustwacht y gobierno, criminalidad organiza por wordo ataca penalmente, administrativamente, via belasting y ley civil. Na 2012 a keda realiza un CBA Aruba. Tambe lo cuminza cu comparti informacion entre e departamentonan, cu lo hunga un rol den e lucha contra criminalidad organiza. Bao guia di Ministerio Publico lo start un Centro di Informacion y Expertisio cerca Cuerpo Policial di Aruba y/of un Plataforma Informacion Hudicial bao guia di Ministerio Publico. E investigacionnan di organizacionnan criminal lo wordo haci pa Cuerpo Policial di Aruba y RST. Ta trata di investigacion a base di informacion, caminda e escogencia y e progreso di e investigacionnan penal ta forma parti di e Stuurgroep Aruba (Ministerio Publico, Cuerpo Policial di Aruba y RST). Mas leu tin un Stuurgroep RST, for di unda e investigacionnan ta wordo dirigi cu ta wordo haci dor di RST.

1.1.7.Traficacion di hende
Traficacion di hende, caminda personanan bao coercion of engaño ta bin den poder di otronan, y contrabando di hende, caminda personanan ta yuda otronan pa drenta of keda Aruba ilegalmente, ta delitonan cu tin cu haya prioridad cu vista riba e MOU entre e Ministernan di Husticia di Reino. Di gran interes ta e enfoke riba organizacionnan criminal, documentonan falso of falsifica di viahe y identidad, e schijnhuwelijknan, et cetera. Pa e rason aki Ministerio Publico ta participa den un Taskforce di traficacion y contrabando di hende, caminda e enfasis ta poni riba proposicionnan di maneho encuanto voorlichting, prostitucion y labor. Ministerio Publico ta participa activamente den e enfoke di cadena cu Cuerpo Policial, Bureau slachtofferzorg, Departamento di Labor, IASA, Dimas y Censo. Tin un fiscal especialmente encarga cu e cartera aki.

1.1.8. Trafico
Ministerio Publico a traha un Verkeersplan 2012, cu ta sostene e control di trafico mas intensivo di Cuerpo Policial di Aruba. Punto di salida ta cu e consecuencianan di un infraccion di trafico mester bira mas pisa, pa baha e cantidad di infraccionnan. Kita un vehiculo temporalmente of no, y boetnan mas pisa, den combinacion cu un maneho di cobramento di boet mas stricto lo baha e total di infraccionnan. Tambe lo adapta e modelo OPV (Oproeping Proces-verbaal) via Landsbesluit, pa asina Cuerpo Policial por duna OPV pa tur infraccionnan di trafico comun. Un metodo asina di traha envez di manda proces-verbaal ta nifica pa Cuerpo Policial y Ministerio Publico un carga di trabao mas abao. Prioridad lo ta riba actua contra comportacion den trafico cu ta causa mortonan of victimanan cu lesionnan grave. Core bao influencia di alcohol of droga of stuurmento baldadi, bao di cual ta cay violacionnan di velocidad maximo, lo wordo intensivamente aborda pa Cuerpo Policial. Ministerio Publico lo persigui e hechonan aki mas rapido. Tambe Reclassering lo introduci un Alcohol Verkeerscursus (un curso Alcohol y Trafico). E curso aki lo wordo impone como medida banda di un castigo condicional. Dor di e Comision Trafico Sigur Aruba a wordo haci proposicionnan pa adapta leynan, cu lo duna mas autorizacionnan pa kita y tene rijbewijs di un persona.

1.1.9. Medio ambiente
Den un pais manera Aruba, fuertemente dependiente di turismo, un maneho activo y adecuado di medio ambiente ta esencial. Conseho di Minister a desaroya un maneho nobo rond di dumpmento di sushi ilegal y a encarga Ministerio Publico cu coordinacion di e mantencion di e maneho nobo aki. Fiscal Mayor ta encabeza e team di coordinacion, den cual tur e partnernan den cadena ta participa. Na 2012 lo bin un Handhavingsplan Milieu. Riba termino corto e Landsverordening Milieubeheer lo drenta na vigor. E mantencion di e ley aki lo exigi atencion conhunto di e partnernan di cadena.

1.1.10  Ehecucion di decisionnan penal
E credibilidad di husticia penal ta bin den expresion den ehecucion di e imposicion di sancionnan penal. Por trata aki di transaccionnan y  sepot condicional ofreci pa fiscal, of di decisionnan di huez. Ministerio Publico a inverti den un maneho di incasso activo den cooperacion estrecho di CEA y KIA. Despues di un aviso pa paga, e incasso ta wordo tuma over pa CEA, cu lo hiba e persona KIA si e no paga. E presentacion di informe di Reclassering na final di enjuiciamiento di TOM cu un persona a keda sin cumpli cu ne y den cuadro di keda sin cumpli cu condicionnan den un sentencia of ora hende wordo poni den libertad condicionalmente, lo haya prioridad. Ministerio Publico ta sostene via e instrumentario penal, e cuido di delincuentenan adicto den Centro Dakota of na otro instancianan y ta traha hunto cu e partnernan di cadena envolvi. Ademas e ponemento bao curatela ta wordo aplica den estrecho cooperacion. E preparacion di e medida nobo di SOV, cu lo drenta na vigor cu e Codico Penal nobo, lo wordo tuma den cooperacion cu e partnernan di cadena, pa asina e ehecucion di e medida di SOV por drenta mas liher posible.

Cooperacion entre Ministerio Publico y partnernan di cadena

Ministerio Publico tin e responsabilidad final pa husticia penal, pero esaki ta tuma lugar den cooperacion cu otro departamentonan di gobierno. Ta trata di departamentonan cu ta pertenece primario na husticia penal (Cuerpo Policial di Aruba, GEA, RST, MOT, Kustwacht, et cetera) y di otro departamentonan cu pa aplicacion di ley riba nan areanan ta haci uso tambe (aunke den regla no primario) di buitengewoon agentnan van politie. Mantene y mehora e cooperacion cu tur e departamentonan aki ta prioridad pa Ministerio Publico. Den Ministerio Publico a keda apunta fiscalnan y juridisch medewerkernan pa esaki, cu ta percura pa e cooperacion cu e departamentonan responsable y pa mantene e cooperacion aki tambe. Den e relacion di cooperacion aki Ministerio Publico ta dirigi riba calidad y unda ta necesario riba mehoracion di calidad di e procesonan di investigacion. Ta dirigi riba e cooperacion cu tur departamento den acuerdonan bilateral. Ademas e obhetivo ta pa pone e palabracionnan tocante persecucion y resolve casonan cu e departamentonan den convenionan. Na e manera aki e procesonan di aplicacion administrativo y penal ta wordo sintoniza cu otro. Entre otro e introduccion legal di e posibilidadnan pa impone boetnan administrativo den e ultimo añanan ta obliga pesey.